Nagpahigayon ug baby shower sila Manny ug Jinkee Pacquiao alang sa ilang unang apo gikan kang Jimuel Pacquiao ug sa partner niini nga si Carolina, nga hapit na manganak sa ilang baby girl karong buwana.
Gipaambit ni Jinkee sa iyang Instagram ang mga hulagway sa espesyal nga okasyon, lakip ang photo nila Jimuel ug Carolina samtang gihuptan ang ultrasound image sa ilang anak.
Makita usab ang kalipay sa tanan, ilabina kay naka-baby pink outfit si Carolina ug klaro na ang iyang baby bump.Mitambong usab sa party ang ginikanan ni Carolina. Wala lang hisgoti ni Jinkee kung ikasal na ba ang magtiayon.
Sa mga litrato makita ang excitement nina Manny ug Jinkee isip first-time grandparents. Na-capture pa gani nga gi-ayo ni Manny ang crib nga ilaha gyud gipangandaman para sa ilang apo.
Kahinumdoman nga miaging bulan gipahibalo ni Jinkee nga baby girl ang ilang apo atol sa gender reveal. Nasayop pa siya og tagna kay lalaki ang iyang gituohan, apan nalipay gihapon sila sa resulta.
Sumala pa ni Jinkee sa usa ka post nga paspas kaayo ang panahon gikan sa pagkugos niya kang Jimuel sa una, karon iyang apo na ang iyang kugoson sa sunod buwan.
Photo courtesy: Philstar
