Naghimo og imbestigasyon karon ang Department of the Interior and Local Government (DILG) sa pipila ka mga alkalde ug lokal nga opisyal sa Sugbo (Cebu) nga mibiyahe padulong sa Europa samtang nagpadayon ang Bagyong Tino sa paghapak sa probinsya, nga nagdala og grabeng kadaot ug mikalas og kapin usa ka gatos (100) ka kinabuhi.
Sumala ni Assistant Provincial Administrator Aldwen Empaces, gimanduan sa DILG Central Office ang Kapitolyo sa Cebu nga mosumite og mga travel order ug may kalabutan nga dokumento aron masuta kung adunay legal nga basehan ang mga biyahe sa nahisgutang mga opisyal.
Lakip sa gihatagan ni Gobernadora Pamela Baricuatro og Foreign Travel Authority (FTA) ang pito (7) ka alkalde gikan sa nagkalain-laing lungsod sa Cebu, ingon man si Provincial Board Member Andrei Duterte. Giklaro ni Gobernadora Baricuatro nga ang mga travel authority napirmahan sa wala pa miigo ang bagyo ug uban pang kalamidad sa rehiyon.
Samtang, si Tourism Secretary Christina Garcia Frasco naa sa London niadtong Nobyembre 4 isip pangulo sa delegasyon sa Pilipinas sa World Travel Market. Pagkadungog sa katalagman, dali ra siyang mipauli sa nasud kauban ang iyang bana, si 5th District Representative Duke Frasco, aron mangulo sa mga relief operation sa Cebu.
Photo courtesy:PNA
