Gimando sa Department of the Interior and Local Government (DILG) Zamboanga del Sur ang pagpa-aktibo sa tanang mga Local Price Coordinating Council (LPCCs) sa tanang mga kalungsuran sakop sa lalawigan.
Kini dungan sa pagdeklara sa National State of Calamity sa tibuok nasud epekto sa Bagyong Tino ug Supertyphoon Uwan nga misulod sa Philippine Area of Responsibility (PAR).
Matod ni DILG Zamboanga del Sur Provincial Director Dave Barrot, subay sa Memorandum Circular 2025-044 ang tanang mga Local Government Units gitahasan nga i-re-activate ang Local Price Coordinating Council aron dunay mututok sa pagmonitor sa mga presyo sa mga nanag-unang mga palaliton.
Gisaysay ni PD Barrot, hugot nga patutukan niining higayuna ang hoarding sa tanang mga nanag-unang mga palaliton aron dili ma-manipula sa mga negosyante ang presyo pinaagi sa Department of Trade and Industry (DTI) dungan sa pag-igo sa Bagyong Tino ug Supertyphoon Uwan.
Samtang nanawagan si PD Barrot sa tanang mga LGUs o mga Local Chief Executives sa pagsunod sa kamanduan sa ilang buhatan alang sa kaayuhan sa mga ginsakupan.
