Nadakpan sa kapulisan ang usa ka 43-anyos nga lalaki nga nalista isip Top 1 Most Wanted Person sa probinsya sa Bukidnon tungod sa kasong murder, sa Barangay Mansanas, Josefina, Zamboanga del Sur, adlawng Miyerkules, Oktubre 21, 2026.
Ang pagdakop resulta sa hiniusang manhunt operation sa mga personahe sa Josefina Municipal Police Station ug Kadingilan Municipal Police Station ubos sa Police Regional Office 10, pinaagi sa pagpatuman sa warrant of arrest. Ang warrant giisyu sa Regional Trial Court, Tenth Judicial Region, Branch 8 sa Malaybalay City, Bukidnon, niadtong Oktubre 9, 2026, alang sa kasong murder, nga walay girekomendar nga piyansa.
Human sa dokumentasyon sa Josefina Municipal Police Station, gitugyan ang nadakpang lalaki ngadto sa mga personahe sa Kadingilan Municipal Police Station sa Bukidnon alang sa tukmang legal nga aksyon.
Photo courtesy: Istock
