Gi-inagurahan na ang Balay Silangan Reformation Center sa Midsalip, Zamboanga del Sur niadtong Oktubre 20, 2026 nga gihimo sa pagpanguna sa LGU Midsalip ug sa Philippine Drug Enforcement Agency (PDEA) Region 9.
Sa maong kalihukan gipasiugda ni Regional Director Bryan B. Babang ang kamahinungdanon sa maong programa sa pagpalig-on sa kampanya batok sa ilegal nga droga, ilabina sa pagpatuman sa Barangay Drug Clearing Program.
Gipasalamatan usab niya ang lokal nga kagamhanan sa Midsalip ug ang mga hingtungdan nga ahensya nga mitabang sa pagtukod ug pag-abli sa maong pasilidad.
Gipirmahan usab ang Memorandum of Agreement tali sa mga hingtungdan nga ahensya aron klarohon ang tagsa-tagsa nilang tahas ug responsibilidad sa pagpatuman sa programa.
Gipaila usab ang 24 ka kwalipikadong drug pushers nga moagi sa proseso sa pagbag-o ug hatagan og ikaduhang higayon aron makabalik sa husto nga dalan.
Samtang, gipasalig sa PDEA Region 9 ang padayon nga suporta sa mga programa sa rehabilitasyon ug reintegrasyon sa komunidad isip kabahin sa paningkamot sa gobyerno nga mapakgang ang ilegal nga droga.
Photo courtesy: PDEA-9
