Imbestigahan sa Department of Labor and Employment (DOLE) ang mga BPO Companies nga pugsanon nga gipatrabaho ang mga trabahante bisan sa pag-igo sa Bagyong Uwan.
Tanang regional directors ang gitahasan sa pagsusi sa maong mga report batok sa mga BPO Companies nga namugos matod pa sa pagpatrabaho sa ilang mga empleyado.
Matod ni Labor secretary Bienvenido Laguesma, kinahanglan nga ipasabot sa kompanya ang rason sa pugsanon nila nga pagpatrabaho sa mga trabahante bisan sa delikado nga kondisyon sa panahon.
Dili matod pa palabyon sa DOLE ang mga lakang nga nakahatag ug kakuyaw sa kinabuhi sa mga mamumuo.
Gisiguro ni Laguesma, prayoridad sa buhatan ang kaluwasan ug katungod sa tanang mga mamumuo sa lain-laing industriya, dili lamang sa BPO sector.
Pagpaklaro sa DOLE, sutaon lang nila kon kamatuoran ba ang giingon sa pipila ka mamumuo nga sila kinahanglan motrabaho gumikan kay sila pugsanon nga gipahimo sa Notice to explain, ug pagtangtang sa incentives.
Photo Courtesy to:ABS-CBN
