Gi-abisuhan sa Department of the Interior and Local Government (DILG) ang tanan nga mga Local Government Unit sa Zamboanga del Sur sa pagpa-aktibo sa mga Emergency Operations center (EOC) sa matag munisipalidad.
Matod ni DILG Zamboanga del Sur Provincial Director Dave Barrot, kini nga lakang nahisubay sa gipakanaog sa DILG Central Office aron mapangandaman ang posibleng epekto sa nagsunod nga mga bagyo nga misulod sa Philippine Area of Responsibility (PAR).
Gisaysay ni Barrot, isip sila ang chairman sa Disaster Risks and Management Council kinahanglan sila nga muhimo ug lakang sama sa MDRRMC meeting, paghimo ug mga strategic plans sa wala pa miigo ang bagyo ug paghimo ug assessment human sa bagyo.
Lakip nga gitahas sa DILG ngadto sa mga LGUs mao ang paghatag ug mga situational reports, sama sa paghatag ug update ang mga nasinatiang panahon sa usa ka lugar ug passable pa ba ang mga dalan dala sa epekto sa mga bagyo.
Kahinumuduman, ning adlawng Huwebes gideklara sa pamunuan sa nasud ang national state of calamity gumikan sa epekto sa Bagyong Tino ug Supertyphoon Uwan nga nakaapekto sa pipila ka mga rehiyon sa nasud.
