Nakasinati og pagbaha ang pipila ka bahin sa syudad sa Cagayan de Oro ug kasikbit nga mga syudad ug munisipyo sulod sa Probinsya sa Misamis Oriental, kini tungod sa sagunson nga pag-ulan nga dala sa Bagyong Uwan.
Sa nahipos nga datos sa Misamis Oriental Provincial Information Office, sukad adlawng dominggo, adunay nanghikling nga mga pamilya ngadto sa mga evacuation center aron nga malayo sa peligro mao ang mga mosunod: Talisayan – 119 families; 369 individuals; El Salvador City – 206 families; 1,340 individuals; Villanueva – 37 families; 154 individuals; Lagonglong – 20 families; 110 individuals; Opol – 243 families; Jasaan – 16 families; 64 individuals; Tagoloan – 12 families; Binuangan – 10 families; Salay – 6 families.
Samtang sa Cagayan de Oro City, aduna mokabat usab sa gatusan ka pamilya ang ning bakwit sa mga covered court kilangkuban kini sa: Barangay Bulua -10 ka pamilya kon 62 ka indibidwal; Barangay Pagatpat nga aduna’y 82 ka pamilya kon 232 ka indibidwal; Barangay San Simon nga aduna’y 78 ka pamilya kon 284 ka indibidwal; Barangay Bonbon nga aduna’y 7 ka pamilya kon 26 ka indibidwal; Barangay Bayabas nga aduna’y 51 ka pamilya kon 238 ka indibidwal ug Barangay Canitoan nga aduna’y 53 ka pamilya kon 146 ka indibidwal. Ang matag pamilya nakadawat og relief goods gikan sa lokal nga panggamhanan sa syudad.
Sa pikas bahin, giandam sa 4th Infantry (Diamond) Division ang ilang mga tropa nga ideploy alang sa Humanitarian Assistance and Disaster Response operations sa mga lugar nga posibleng maapektuhan sa Bagyo.
Sa pakigkoordina sa mga LGU ug Disaster Risk Reduction and Management Offices, ang mga yunit sa 4ID andam mutabang sa rescue operations, relief distribution, evacuation support, ug road clearing sa mga komunidad nga pinakalisod ang kahimtang.
Matod ni Major General Michele B. Anayron Jr., Commander sa 4ID, nga padayon ang ilang komitment sa pagluwas sa kinabuhi ug paghatag og hinabang sa mga apektadong residente.
Photo courtesy: Misamis Oriental Provincial Information Office
