Mokabat na sa 111 ang namatay sa kadaot nga dala sa Bagyong Tino sa probinsya sa Cebu, sumala sa report sa Cebu Provincial Disaster Risk Reduction and Management Council (PDRRMC) kagahapon Nobyembre 5, 7:20 pm.
Base sa datos sa PDRRMC, ang mga namatay gikan sa lain-laing mga lokal nga yunit sa gobyerno sa probinsya. Ang pinakadaghang namatay natala sa lungsod sa Liloan nga adunay 35, gisundan sa Compostela nga adunay 25 ug Danao City nga adunay 9.
Samtang aduna usab nakabsan sa kinabuhi nga natala sa lain-laing lugar sa cebu nga mao ang mga mosunod: Cebu City – 12,Asturias – 2, Balamban – 6, Bantayan – 1, Consolacion – 1, Mandaue City – 12, ug sa Talisay City – 7, Tabogon – 1.
Sumala sa PDRRMC, ang maong numero gikan lamang sa Cebu Provincial Office ug wala pay pormal nga nalakip sa kinatibuk-ang datos sa Office of Civil Defense (OCD).
Nagpadayon ang mga operasyon sa pagpangita ug pagluwas sa mga lugar nga grabeng naapektuhan sa bagyo.
Samtang, gilauman nga mopagawas ang OCD og updated nga report sa mga namatay sa umaabot nga mga oras aron makuha ang kinatibuk-ang gidaghanon sa mga biktima sa tibuok rehiyon sa Central Visayas.
via: Juanito Espinosa/EPA
