Andam na usab si Senate President Pro Tempore Ping Lacson nga subli nga pamunuan ang Blue Ribbon Committee nga nag-imbestigar sa maanomalyang mga flood control projects.
Sa usa ka press conference, giingon ni Lacson nga kung mapili siya pag-usab sa plenaryo, dawaton niya ang chairmanship aron mapadayon ang naputol nga imbestigasyon.
Dugang pa niya, andam na siya sa posibleng pagkwestiyon sa pipila ka senador kabahin sa bisan unsang desisyon o direksyon sa imbestigasyon kabahin sa flood control scandal.
Gipasabot usab ni Lacson nga nagka-istorya na sila ni Senate President Tito Sottokabahin sa posibilidad nga maapektuhan ang iyang liderato kon makalingkod siya pag-usab isip chairman sa komite.
Samtang sa umaabot nga pagdungog sa komite, adunay ipaila si Lacson nga usa ka “very important witness” nga mobutyag og bag-ong mga impormasyon kabahin sa giingong iregularidad sa mga flood control projects.
Sumala ni Lacson, makatabang ang testimonya niini aron masirhan ang tanang nahabiling isyu ug mapalig-on ang kaso batok sa mga nalambigit.
Gipugngan ni Lacson ang paghingalan sa testigo, apan iyang gisulti nga adunay kini ipagawas nga mahinungdanong impormasyon sa pagdungog
Gipasiugda usab sa senador nga posible nga bag-ong mga ngalan ug pipila nalang sa mga daan nga mga personalidad ang malambigit base sa pamahayag sa testigo.
Sa dihang gipangutana kung ang testigo ba mismo ang miduol sa iyang opisina mitubag si Lacson nga adunay “conduit” o tighimamat nga nagtabang sa ilang komunikasyon.
Gikatakda ang sunod nga pagdungog sa Senate Blue Ribbon Committee sa Nobyembre 14, depende sa pag-apruba sa Senate Committee on Finance.
Photo courtesy to: politiko.com.ph
