Gi-activate sa Department of Energy (DOE) ang mga emergency protocol niini sa sektor sa enerhiya subay sa pagduol sa Bagyong Tino aron mapreserbar ang suplay sa kuryente ug gasolina ug maminusan ang pagkabalda sa mga apektadong komunidad.
Matod sa DOE, anaa na karon ang Task Force on Energy Resiliency sa ahensya ug nakig-alayon usab sila sa National Inter-Agency Coordinating Cell aron mamonitor ang epekto sa bagyo ug mapadali ang recovery operations.
Gibutyag ni Undersecretary Felix William Fuentebella, Chair sa Task Force, nga prayoridad nila sa pagkakaron ang kaluwasan ug kaayohan sa komunidad.
Diin ang opisyal nagkanayon nga nakig-alayon sila sa mga power generator, transmission providers, distribution utilities, electric cooperatives, ug fuel suppliers aron pangandaman ang epekto sa bagyo ug alang sa hinanaling pagbalik sa serbisyo kung ang bagyo moigo sa mga apektadong lugar.
Sa samang higayon, ang National Grid Corporation of the Philippines (NGCP) nag-preposition usab sa repair crews ingon man sa pagmentinar sa mga linya sa komunikasyon, samtang ang mga electric cooperatives giayo ang posibleng peligro sa mga linya sa kuryente.
Dugang pa, andam na usab ang diesel power plants sa NPC-SPUG sa Bohol human sa mga precautionary evacuation sa lokal nga kagamhanan.
Gitun-an usab sa DOE ang mga suplay sa gasolina, nga maoy importante sa pag-access sa mga serbisyo sa emerhensya ug kritikal nga mga pasilidad.
Gitambagan usab ang mga residente nga mag-andam sa mga kinahanglanon sa emerhensya, ipadayon ang pag charge sa ilang mga telepono, ug sutaon ang hotline sa ilang power provider.
Photo Courtesy to:DOE
