Nameligro sa pagbaha ug pagdahili sa yuta ang kapin sa 25,000 ka mga tulunghaan sa nasod, tungod sa kusog nga ulan nga dala sa Severe Tropical Storm Tino, matod sa Department of Education (DepEd).
Sumala sa DepEd-Disaster Risk Reduction and Management Service, 9,558 ka mga tulunghaan ang delikado sa pagbaha samtang 15,668 ka mga tulunghaan ang delikado sa pagdahili sa yuta.
Gitambagan sa DepEd ang mga tulunghaan ug local government units, nga mangandam alang sa emerhensiyang pagresponde, ug sigurohon nga luwas ang ilang mga ekipo ug suplay.
Alas 5 sa hapon niadtong Nobyembre 2, ang bagyong Tino nagmintinar sa maximum sustained winds nga 95 kph, paghuros nga moabot sa 115 kph, ug naglihok paingon sa kasadpan ibabaw sa Philippine Sea, kung asa anaa sa Signal No. 1 ang siyam ka lugar sa Eastern Visayas ug Northern Mindanao.
Gilauman sa PAGASA nga posibleng mokusog pa ang bagyo ug moabot sa super typhoon strength.
Photo Courtesy to:DepEd
