Gihatagan sa Department of Human Settlements and Urban Development (DHSUD) ug dugang panahon ang mga pribadong developer aron mosunod sa Republic Act 10884 ilabi na sa probisyon sa Balanced Housing Development Program (BHDP).
Pinaagi sa usa ka memorandum nga gipermahan ni DHSUD Secretary Jose Ramon Aliling, gilugwayan sa ahensya ang pagpatuman sa cease and desist order (CDO) ug ang suspension o kanselasyon sa licenses to sell hangtod Disyembre 31, 2025.
Tumong niini nga desisyon nga matabangan ang mga developer nga naapektohan sa istriktong implementasyon sa balaod ug aron makaangkon sila’g igo nga panahon sa pagtuman sa ilang katungdanan. Apan giklaro sa DHSUD nga ang monetary fines alang sa mga dili mosunod magpabilin ug diretsong ipatuman diha-diha dayon human madawat ang Order of Imposition of Administrative Sanction (OIAS).
Sumala pa ni Secretary Aliling, kini usa ka “win-win approach” alang sa gobyerno ug pribadong sektor. Matod niya, pinaagi sa dugang panahon, mapalig-on ang kooperasyon tali sa duha ka sektor ug masiguro nga mas daghang socialized housing projects ang matukod para sa ubos nga sektor sa komunidad.
Sa unang bahin, gisusi sa DHSUD ang kapin o kulang 600 ka real estate projects nga nakitang wala nituman sa RA 10884, ilabi na sa Balanced Housing Development Program. Ang nasangpit nga assessment kabahin sa Zero Backlog Program nga gipangulohan ni Senior Undersecretary Sharon Faith Paquiz aron masulbad ang mga pending nga regulatory concerns sa ahensya.
Ilalom sa RA 10884, ang mga developer sa bag-ong residential subdivision ug condominium projects obligado nga motukod ug socialized housing, 15% para sa subdivisions ug 5% para sa condominiums, o pinaagi sa alternatibong compliance methods.
Nagpadayon ang koordinasyon tali sa DHSUD ug mga grupo sa developer nga nagpabilin sa tumong nga mapaabot sa matag pamilya ang balay nga may dignidad ug kasiguruhan.
Photo courtesy: UN-Habitat Philippines
