Mipadayag pag-usab si Senador Joel Villanueva ug Jinggoy Estrada nga wala silay kalabotan sa giingong korapsyon sa mga proyekto sa Flood Control, human ang Independent Commission for Infrastructure (ICI) nagrekomendar sa Office of the Ombudsman (OMB) nga kasuhan sila og plunder, bribery, ug uban pang may kalabutan nga reklamo.
Sumala sa rekomendasyon sa ICI, giingong nakabenepisyo ang duha ka senador gikan sa mga anomalosong proyekto sa imprastraktura. Apan, hugot nga gihimakak ni Villanueva ang pasangil, nga giingon niyang kanunay siyang supak sa ingon nga mga proyekto.
Matod pa ni Villanueva, ang testimonya lang sa kanhing DPWH District Engineer nga si Henry Alcantara ang nagbatok kaniya, ug ang pahayag ni Alcantara klarong nag-ingon nga wala siyay kalabotan sa mga proyekto. Miingon usab siya nga maghulat sa aksyon sa Ombudsman ug mopasaka og pormal nga tubag sa hustong panahon aron mapamatud-an ang iyang pagka-inosente.
Samtang si Estrada, hugot usab nga gihimakak ang mga akusasyon, nga nag-insister nga wala siyay nadawat nga pondo nga may kalabotan sa mga proyekto sa pagkontrol sa baha. Gipasiugda niya nga determinado siya nga limpyohan ang iyang ngalan ug nagpabilin nga masaligon nga sa hustong panahon, ang kamatuoran mopatigbabaw.
via: Senador Joel Villanueva/ Jinggoy Estrada
