Usa ka mahinungdanong kalihokan nga nagtapok sa mga Indigenous Cultural Communities (ICCs) ug Indigenous Peoples (IPs) gikan sa lain-laing rehiyon sa Mindanao ang gipahigayon sa unang Indigenous Peoples (IP) Summit sa Bukidnon didto sa Kaamulan Open Theater, Malaybalay City niadtong Oktubre 28, 2025.
Ang summit gipasiugdahan sa Department of Agriculture (DA) sa pakigtambayayong sa National Commission on Indigenous Peoples (NCIP) ug sa lokal nga panggamhanan sa Malaybalay, nga nagtumong sa pagpalig-on sa partisipasyon sa mga lumad sa rural development ug sustainable livelihood programs.
Gipasabot ni Lana May Racinez, OIC RTD for Research and Regulation ug Deputy Project Director sa DA-X, sa exclusive nga pakighinabe sa Juander Radyo Malaybalay nga ang tumong sa kalihokan mao ang pagpalig-on sa partnership sa IPs, ICCs, NCIP, lokal nga gobyerno, ug sa DA aron ang mga lumad dili lang mahimong benepisyaryo kundi kaabag sa pag-implementar sa mga proyekto.
Lakip sa gihisgutan sa summit mao ang mga proyekto sa DA ubos sa NYEB-P Program, sama sa pagpanghatag og kabaw, baka, coffee processing facilities, farm-to-market roads, irrigation systems, ug potable water supply projects, aron mapaayo ang panginabuhian sa mga lumadnong komunidad.
Gipakita usab sa summit ang kahinungdanon sa partnership tali sa DA ug NCIP, nga naghatag og oportunidad alang sa mas duol nga koordinasyon ug episyenteng pag-implementar sa mga proyekto alang sa sustainable livelihood programs sa mga lumadnong komunidad, matod pa ni Racinez sa usa ka exclusive pakighinabi sa Juander Radyo Malaybalay.
