Nabanggaan og motorsiklo ang usa ka magtutudlo sa National Highway Purok 2, Barangay Lanao, Kidapawan City, alas 6 sa kagabhion niadtong Oktubre 29, 2025.
Giila ang biktima nga si Jeconi Joice Paler, 33-anyos, ug residente sa nahisgutang lugar, samtang giila usab ang driver sa Honda Click 125 nga motorsiklo nga si Christian Curator, 23-anyos, residente sa Housing Village, Brgy Amas sa nahisgutang syudad.
Sa report sa Traffic Section sa Kidapawan City Police Station, nasuta nga ginalatas sa motorsiklo ang dalan paingon sa Cotabato City ug pag-abot sa lugar, aksidente niining nabanggaan ang biktima nga naga tabok sa dalan.
Nasuta usab nga kusog ang dagan sa motorsiklo dihang nahitabo ang aksidente. Tungod sa kakusog sa impact, nalagpot ang pedestrian lakip na ang driver sa motorsiklo.
Daling gidala sa balay tambalanan ang magtutudlo, apan alas 2:30 sa buntag ning adlawng Huwebes Oktubre 30, nahikabsan kini sa iyang kinabuhi.
Samtang, padayong nagapaalim sa balay tambalanan ang driver sa motorisklo nga nakaangkon og seryoso nga mga samad sa lawas ug ulo.
