Gibutyag ni Senate President Pro Tempore Panfilo “Ping” Lacson, nga ang Department of Public Works and Highways (DPWH), nigahin ug labing menos ₱50-B gikan sa unprogrammed appropriations sa 2024 national budget, alang sa infrastructure projects, lakip ang ₱30-B para sa flood control projects.
Matod ni Lacson, tataw kining timailhan nga pipila ka mga opisyal sa DPWH ang nagpadayon sa pagpatuman sa mga proyekto nga dili subay sa master plan sa gobyerno. Dugang usab niya nga murag naanad na ang ahensya sa pagpundo sa mga proyekto sa flood control projects, nga dili subay sa kinatibuk-ang plano sa gobyerno.
Gipaambit ni Lacson, nga ang mga pundo gikan sa wala maprograma nga mga appropriations, giapod-apod sa nagkalain-laing distrito nga walay klarong basehanan nga miresulta sa pagdaghan sa mga flood control projects.
Matod niya pamatuod kini sa balikbalik nga pag-abuso sa pundo sa publiko. Samtang, miinsistir usab si Lacson nga tangtangon sa Senado ang ₱42-B nga gigahin alang sa social assistance programs o ayuda, gikan sa wala maprograma nga mga appropriations sa 2026 national budget bill.
Dugang pa niya, nga ang maong matang sa mga programa kinahanglang ibutang sa regular nga budget ug dili sa unprogrammed funds, nga igahin lamang alang sa foreign-assisted projects.
Photo Courtesy to: PNA
