Padayong naghangyo ang kabomberohan ning lalawigan sa Bukidnon sa katawhan nga hinumdoman gayud kanunay ang pag tawag ug una ayha ang pagkuha ug video sa social media kung adunay mahitabong emerhensya sama sa sunog.
Gitumbok ni Bukidnon Provincial Bureau of Fire Protection Spokesperson Rene R. Rubillos nga gikinahanglan gayod ang matag indibidwal adunay contact number sa BFP sa lokalidad ug batasanon gayud ang “tawag muna bago camera” nga slogan aron makatabang panahon sa emerhensya human sa natigayong dakong sunog sayo sa buntag kagahapon Oktubre 28, 2025 didto sa Purok-5 Central Poblacion, Kalilangan.
Gipamatud-an sab ni BFP Kalilangan Fire Investigator Jerome Ampatua nga giingong nagsugod ang pag-ulbo sa kalayo sa may alas 5:30 sa buntag apan nakatawag ang mga tawo sa BFP bandang alas 5:46 na hinungdan nga pag-abot sa kabomberohan sa alas 5:48 wala na matabang ang sunog ug naugdaw ang mga gambalay gumikan kay gama sab kini sa mga light materials.
Gibana-banang mokabat sa dul-an o kapin usa ka milyon pesos ang natalang damyos sa maong sunog sa ancestral house sa pamilyang Concemino, bakery, usa ka tindahan, spare parts ug ang batchoyan sa maong lugar.
Sa karon padayon ang gihimong imbestigasyon sa BFP Kalilangan pagsuta sa tinubdan sa insidenti.
via: BFP Kalilangan
