Nagtinguha ang lokal nga panggamhanan sa Cagayan de Oro nga palambuon ang communication system pinaagi sa pagpasar og ordinansa.
Sa nilabayng sesyon, gihisgutan ni Konsehal Roger Abaday ang padayong ginahimong pagpanghipos sa mga kable sa kuryente sa mga telecommunication company nga naglambod ug nagbitay na sa kadalanan nga posibleng makahatag pa og peligro sa mga motorista ug pedestrian.
Gane sa gimugnang task force, kilo-kilometro na nga mga spaghetti wires ang natanggal lakip na mga poste nga ning bahirig o nibabag sa kadalanan.
Pagpasabot ni Konsehal Abaday nga pinaagi sa ordinansa, ma-regulate ang pagtukod og dugang mga poste sa mga telco companies ug pagpaniguro nga ilahang naatiman ang uban pa nilang pasilidad.
Samtang gilakbitan sab ang ginalaraw sa pagduso og underground cabling projects sa syudad aron nga didto na ipaagi ang mga kable sa elektrisidad ug telco companies. Nasugdan na sab kini partikular sa Barangay Carmen ning dakbayan, atubangan mismo sa Department of Health Regional Office.
Photo courtesy: City Information Office
