Gilaumang mag-abli sa bag-ong ekonomikanhong mga oportunidad alang sa Pilipinas ang nahitabong pagpinirmahay sa Association of Southeast Asian Nations (Asean) ug China niadtong Oktubre 28 didto sa Kuala Lumpur Convention Center, Malaysia alang sa ilang free trade agreement.
Gipirmahan kini nila Malaysian investment, trade, and industry minister Tengku Zafrul Aziz ug commerce minister sa China nga si Wang Wentao.
Ang maong free trade agreement gitawag nga Asean-China Free Trade Area (ACFTA) 3.0 Upgrade, diin kini gisaksihan ni Presidente Ferdinand Marcos Jr., uban sa mga kaubang lider sa Asean uban ni Malaysian Prime Minister Anwar Ibrahim, isip Asean’s chair, ug Chinese Premier Li Qiang.
Ang seremonyas nagtimaan sa usa ka mahinungdanong milestone sa Asean-China economic cooperation, nga nagtukod sa kapin sa duha ka dekada nga lig-on ug mutually beneficial partnership ubos sa ACFTA.
Kahibaloan nga ang ACFTA 3.0 nagtinguha sa pagpalapad sa kooperasyon sa Asean-China ngadto sa bag-o ug emerging areas, lakip ang digital ug green nga ekonomiya, supply chain resilience, competition ug consumer protection ug suporta alang sa micro, small, and medium enterprises (MSMEs).
Photo Courtesy to:PNA
