Sugdan na karong adlawa sa Office of the Ombudsman ang pormal nga imbestigasyon kalabot sa kontrobersiyal nga flood control projects nga gituohang adunay anomalya.
Kini gipahibalo ni Ombudsman Jesus Crispin Remulla atol sa iyang pakigpulong sa mga mamamahayag niadtong Martes, diin iyang giingon nga magsugod na ang preliminary investigation ug ilakip dayon ang mga opisyal nga angay masakop sa proseso.
Niadtong Oktubre 14, 2025, gisumite sa Department of Justice (DOJ) ngadto sa Ombudsman ang report sa ilang imbestigasyon sa lima ka gitawag nga “ghost” flood control projects sa Bulacan.
Sa miaging Agosto, si Commission on Audit (COA) Chairman Gamaliel Cordoba misugo og fraud audit sa mga proyekto sa flood control human sa paghangyo ni Presidente Ferdinand Marcos Jr. nga tukion ang mga isyung kalabot sa implementasyon niini.
Human sa audit, gisumite sa COA kaniadtong Septiyembre 8 ang report sa lima ka proyekto nga adunay kantidad nga Php342 milyon. Gisundan kini niadtong Septiyembre 18 sa laing report bahin sa upat ka proyekto nga gituohang “ghost” projects nga nagkantidad og Php389 milyon.
Sa parehas nga bulan, ang Independent Commission for Infrastructure (ICI), nga natukod pinaagi sa Executive Order No. 94, misumite usab og interim report sa Ombudsman kalabot sa maong mga proyekto.
SOURCE: INQUIRER.NET
