Boluntaryong misurender sa mga awtoridad ang upat ka miyembro sa Communist Terrorist Group (CTG) ug mga kaubang organisasyon atol sa managlahing operasyon sa Police Regional Office 8 (PRO-8) sa Northern Samar ug Eastern Samar niadtong Oktubre 15 ug 18, 2026.
Sa Maydolong, Eastern Samar, boluntaryong misurender niadtong Oktubre 15 si alyas “Rey,” 37 anyos ug usa ka mag-uuma. Miyembro siya sa Underground Mass Organization (UGMO) ug nalakip sa listahan sa Non-Periodic Status Report (NPSR) ubos sa Sub-Regional Committee (SRC) Sesame sa Eastern Visayas Regional Party Committee (EVRPC). Gipahigayon ang operasyon sa hiniusang pwersa sa 805th Maneuver Company sa Regional Mobile Force Battalion 8 (RMFB-8), kauban ang PNP-IG ISOD ug 2nd Eastern Samar Provincial Mobile Force Company. Gisurender usab niya ang usa ka rifle grenade.
Sa samang adlaw, mibalik usab sa sabakan sa gobyerno sa Hinabangan, Samar si alyas “Mar,” 54 anyos ug usa ka mag-uuma, nga kanhi miyembro sa Communist Terrorist Group (CTG) ubos sa Squad 3 Defense Group (SDG), SRC Sesame, EVRPC. Matod kaniya, nakahukom siyang mobiya sa organisasyon tungod sa kakapoy, grabeng kalisod, nagkahuyang nga suporta sa kalihukan ug tinguha nga magkinabuhi na lamang nga malinawon. Gisurender niya ang usa ka kalibre .45 nga armas nga napapas ang serial number, usa ka magasin, lima ka buhing bala ug usa ka hand grenade.
Niadtong Oktubre 18, boluntaryong misurrender usab sa mga awtoridad sa Catarman, Northern Samar si alyas “Nonoy,” 34 anyos ug usa ka mag-uuma. Kanhi siyang miyembro sa CTG ug nalakip sa listahan sa NPSR ubos sa SRC sa EVRPC.
Gipangulohan ang pagdumala sa iyang pagsurender sa 804th Maneuver Company sa RMFB-8, kauban ang Catarman Municipal Police Station (MPS), PNP-IG ISOD ug 83rd Military Intelligence Company (MIC) sa 8th Military Intelligence Battalion (MIB), 8th Infantry Division sa Philippine Army.
Sa Barangay Cagdine, Oras, Eastern Samar, boluntaryo usab nga misurender si alyas “James,” 25 anyos ug usa ka mag-uuma. Miyembro siya sa Squad 1, F-3, SRC EVRPC ug nalakip usab sa listahan sa NPSR. Gipahigayon ang operasyon sa hiniusang pwersa sa 801st Maneuver Company sa RMFB-8, kauban ang Police Intelligence Team (PIT)-Eastern Samar, Regional Intelligence Unit 8 (RIU-8) ug 1st Eastern Samar Provincial Mobile Force Company (ESPMFC).
Sa pagkakaron, ang lima ka misurender gipailalom sa dokumentasyon, debriefing ug pagtimbang-timbang sa mga may kalabotang yunit. Giandam usab ang ilang mga aplikasyon alang sa posibleng pag-apil sa Enhanced Comprehensive Local Integration Program (E-CLIP), subay sa mga lagda sa gobyerno, aron matabangan sila sa malinawon nga pagbalik ug paghiusa pag-usab sa katilingban.
Photo courtesy: Police Regional Office 8
