Naglunsad og mga lihok-protesta sa tanang 50 ka estado sa Amerika nga gisalmotan sa minilyon ka mga indibidwal aron manawagan og pagsupak sa administrasyon ni Presidente Donald Trump.
Naghugpong sila sa panawagan nga walay angay’ng mahimong “hari” sa Estados Unidos. Apil sa mga miapil ug namulong sa mga protesta ang pipila ka politiko, lakip na sila Democratic Senators Chuck Schumer, Chris Murphy, ug Cory Booker.
Mainitong gidawat si Senador Bernie Sanders sa kusog nga siyagit ug palakpak sa dihang misaka siya sa entablado aron mamulong sa rally didto sa Washington D.C.
Gidahom nga milyon-milyon ang moapil sa kapin sa 2,700 ka lokasyon gikan sa gagmay’ng lungsod hangtod sa dagkong siyudad. Kini nagpakita sa mas lapad ug decentralized nga mga kilos-protesta batok ni Trump, nga sa sinugdan nagpokus lang sa mga demonstrasyon sa Washington D.C. sa panahon sa iyang unang termino isip presidente.
Photo courtesy: KTLA 5 News
