Nakaalerto ang Philippine National Police (PNP) tungid epekto sa Bagyong Ramil dinhi sa nasud, ilabina sa mga dapit sa Luzon ug Visayas. Matod ni Acting PNP Chief PLtGen. Jose Melencio Nartatez Jr., nagpakatap na ang PNP og mga personahe sa mga dapit ug probinsya nga labing apektado sa bagyo.
Gimanduan usab niya ang mga police commanders nga mangandam alang sa posibleng pagbakwit (evacuation) ug ang pagpahigayon og search and rescue kung gikinahanglan kini sa mga naapektuhan nga residente.
Gipasalig usab ni Nartatez ngadto sa mga commanders nga kanunay’ng abli ang komunikasyon ug andam ang tanan nilang pwersa sa bisan unsa nga sitwasyon aron dali nga makatubag.
Dugang pa niini, gipasalig sa hepe ngadto sa publiko nga ang ilang han-ay adunay igong kapasidad ug andam sila mohatag sa gikinahanglan nga tabang (assistance) sa ingon niini nga panahon.
Samtang, gawas sa pagkaandam, padayon gihapon nga nagamonitor ang ilang han-ay sa mosunod pang lihok sa bagyo isip kabahin sa ilang pagpangandam.
Lauman nga karong adlawa, posible ng mugawas sa Philippine Area of Responsibility ang Bagyong Ramil nga adunay international name nga Fengshan.
Photo courtesy: DOST-PAGASA
