Narehistro sa grupong Samahang Industriya ng Agrikultura (SINAG) ang pagtaas sa presyo sa itlog sa miaging mga adlaw. Matod ni SINAG Executive Director Jayson Cainglet, misaka og P0.30 hangtod P0.40 ang farmgate price sa matag usa ka piraso sa itlog.
Nanghinaot si Cainglet nga dili na kini mosaka pa sa mosunod nga mga semana. Iyang gipasabot nga ang mga retailer kasagaran girason ang taas nga demand sa itlog matag panahon sa Pasko, samtang limitado usab ang supply.
Miingon si Cainglet nga bisan tuod miangkon ang industriya sa manok nga limitado ang supply sa itlog sa mga merkado ilabi na panahon sa holiday season, dili angayan nga hatagan og taas nga patong ang presyo sa itlog, aron lang makabaton og mas taas nga kita.
Matod niya, dili kini angay gamiton sa mga retailer aron i-taas og Php1.00 hangtod Php2.00 ang presyo sa matag usa ka piraso sa itlog. Makatarunganon na matod pa ang Php0.50 nga pagtaas sa matag piraso, bisan pa kun motaas ang demand.
Dungan niini, nanawagan usab si Cainglet sa kagamhanan nga bantayan ang pagbaligya sa itlog karong Pasko aron dili kaayo maglisod ang mga consumer. Iyang gipunting ang giingong gihimo sa ubang retailer nga pag-ilis sa klasipikasyon sa ilang baligya, diin ang mga medium size gibaligya isip large, samtang ang mga small size gibaligya isip medium. Ang itlog usa sa kasagarang gigamit nga sagol sa mga pagkaon nga giandam sa Pasko ug Bag-ong Tuig.
Source: Philippine News Agency
Photo courtesy to:OneNews.Ph
