Gipahibalo sa Land Transportation Office (LTO) nga nagsugod na kini og pakigsabot sa mga delivery services ug courier companies alang sa plano nga door-to-door delivery sa mga plate number sa mga sakyanan.
Sumala ni LTO Chief Assistant Secretary Marcus Lacanilao, tumong sa maong inisyatibo nga mas mapadali ug mas komportable ang pagdawat sa mga plaka sa mga tag-iya sa sakyanan, nga dili na kinahanglan pa nga personal nga mobisita sa mga opisina sa LTO.
Gidugang pa ni Lacanilao nga kini nga pamaagi makatabang usab aron malikayan ang mga fixer nga nagpasalig og serbisyo sa pagkuha ug paghatod sa mga plaka nga usahay makapahamtang og dugang gasto ug kalisod sa mga motorista.
Human niini, gihangyo usab sa LTO ang mga tag-iya sa sakyanan nga wala pa’y plaka nga mukuha og authorization gikan sa ilang buhatan aron magamit gihapon nila ang ilang mga sakyanan samtang naghulat sa opisyal nga plaka.
Kahinumduman usab nga gisuspinde sa LTO ang “no plate, no travel policy” nga unta ipatuman na karong Nobyembre 1, 2025, aron hatagan og igo nga panahon ang mga motorista sa pagproseso ug pagkuha sa ilang mga plate number samtang ginapaayo pa ang sistema sa distribusyon niini.
Photo courtesy: TNT Abante
