Giaprobahan na sa Department of Budget and Management o DBM ang pagpagawas sa PHP3.39 bilyon nga pondo alang sa performance-based bonus sa mga personahe sa Philippine National Police (PNP).
Sumala sa DBM, mokabat sa 225,545 ka kwalipikadong opisyal ug personahe sa PNP ang makabenepisyo sa maong bonus. Matag kwalipikadong pulis makadawat og bonus nga katumbas sa 45.5 porsyento sa ilang buwanang suweldo base sa rate kaniadtong Disyembre 31, 2023.
Aron makwalipika, kinahanglan adunay ‘very satisfactory’ rating ubos sa Strategic Performance Management System nga gi-aproba sa Civil Service Commission, o katumbas nga rating nga gikinahanglan sa Career Executive Service Board.
Gipahayag sa DBM nga kini nga lakang subay sa direktiba ni Presidente Ferdinand Marcos Jr. aron mapalambo ang morale sa mga kawani sa gobyerno, ilabina ang mga frontline law enforcers.
Matod pa ni Budget Secretary Amenah Pangandaman, kini nagpunting sa pag-ila sa serbisyo ug paghatag pasidungog sa kapulisan nga padayon nga nagabantay sa kalinaw ug kahapsay sa nasud.
SOURCE: GMA NETWORK
Photo credits to:PNA
