Gibiripika na sa Philippine Navy (PN) ang mga report nga adunay mga istruktura sa ilawom sa dagat sa Bajo de Masinloc nga sakop sa West Philippine Sea (WPS).
Sumala pa ni Rear Admiral Roy Vincent Trinidad, tigpamaba sa PN alang sa WPS, nakadawat sila og report bahin sa mga istruktura sa maong lugar ug dali silang nipahigayon og beripikasyon aron mahibal-an kung bag-ong tinukod kini.
Matod pa ni Trinidad, niadtong 1997 gisulayan na sa China nga magtukod og steel structure sa Bajo de Masinloc, apan gipabuto kini sa mga puwersa sa Pilipinas.
Dugang pa niya, adunay usab mga unang report bahin sa mga bloke o istruktura nga dihang gicheck, nasuta nga mga karaan pa kini nga gitukod sa panahon sa presensya sa US bases, diin gigamit pa kaniadto ang lugar isip bombing range sa US Air Force, US Navy, ug Philippine Air Force.
Kahinumduman nga niadtong miaging bulan, gipahibalo sa China nga magtukod sila og national nature reserve sa Bajo de Masinloc, nga gisuportahan dayon sa diplomatic protest sa Department of Foreign Affairs (DFA) sa Pilipinas.
Gipakita usab sa Australia, Canada, ug Japan ang ilang pagsupak sa maong plano sa China.
Photo courtesy: Institute for Maritime and Ocean Affairs
