Gi-angkon sa Pangulo sa Madagascar nga kasamtangan kining nagtago sa usa ka luwas nga lugar aron protektahan ang iyang kaugalingon human gibaharan ang kinabuhi niini nga patyon, dungan sa usa ka semana nga protesta sa mga kabataan demonstrador nga ginganlan nga “Gen Z Mada” nga nanawagan aron munaog sa iyang katungdanan isip president.
Sa usa ka live broadcast, gibutyag ni President Andry Rajoelina, nga dunay usa ka grupo sa military personnel ug mga pulitiko ang nagplanong i-assassinate kini ug planong maglunsad ug kudeta.
Wala usab niini gisulti kon asa ang lokasyon niini apan dunay mga hungihong nga misibat na kini sakay sa French military aircraft.
Gikan pa kaniadtong adlawng Miyerkules wala na kini nagpakita sa publiko ug pugsanon kining gipanaog sa iyang pwesto.
Nagsugod matud pa ang mga protesta sa maong nasud human mipagawas ug kasuko ang mga katawhan sa pabalik-balik nga pagkawala sa suplay sa tubig ug kuryente nga mas nilala tungod sa dismayadong pagdumala sa administrasyon ni Rajoelina diin nigrabe ang pagtaas sa mga walay trabaho, korapsyon ug krisis nga hinungdan sa cost of living.
Photo courtesy to:Britannica
