Gipanghingusgan karon ni Konsehal Edgar Cabanlas nga amyendahan ang Integrated Ecological Solid Waste Management Ordinance sa syudad aron nga pahamtangan og mas bug-at nga penalty ang mga masakpan nga magpataka lang og labay sa basura bisan asa.
Daghan ng lakang ang gihimo sa syudad sa pag-atiman sa basura apan dili ikalimod nga ning samot kini nga problema tungod na sa kawalay disiplina sa ubang mga lumulupyo nga walay pakabana sa ilang mga basura.
Tungod niini, gisugyot ni Konsehal Cabanlas nga amyendahan ang pipila ka bahin sa ordinansa partikular na ang paghatag og penalty nga gikan sa PHP500, buot kining patas-an sa konsehal ngadto sa PHP5,000.
Dugang pa ang pagwagtang sa community service nga silot ug hulipan og pagkapriso ngadto na sa tulo ka bulan depende sa kabug-aton sa salaud o paglapas sa ordinansa.
Saysay pa sa Konsehal nga ang PHP500 nga penalty ug pag-isyu og Ordinance Violation Receipt huyang ra nga silot alang sa bug-at nga paglapas sa ordinansa nga tibuok syudad ang apektado.
Photo for illustration credits to:Shutterstock
