Duha pa ka halapad nga mga rally batok sa korapsyon ang ipahigayon sa Oktubre 17 ug 21 didto sa kaulohan, sumala sa Kilusang Bayan. Kini nga mga rally ipatuman sa mga grupo nga anaa sa luyo sa gipahigayong Trillion Peso March rally niadtong Setyembre 21.
Apil niini ang mga nag-organisa sa Baha sa Luneta rally nga ang Taumbayan Ayaw sa Magnanakaw at Abusado Network Alliance (TAMA NA), ug uban pang mga organisasyon, lakip na ang Kilusang Bayan Kontra Kurakot nga gilangkuban sa mga anti-corruption groups.
Matod pa sa Kilusang Bayan, nag-andam na ang mga grupo alang sa mas lapad pa nga aksyon sa umaabot nga mga adlaw aron magpadayon ang public pressure ug ang panawagan alang sa paninglan sa responsibilidad kalabot sa nagpadayon nga flood control ug corruption scandals.
Ang mga grupo sa kabatan-onan ang mangulo sa rally ug martsa didto sa Mendiola, Maynila sa Oktubre 17. Sumala pa sa mga organizer, nagdumili ang mga kabatan-onan nga magpakahilom lamang samtang binilyong kaban sa katawhan ang gikawat, busa ilang ipaabot ang ilang tingog ngadto sa mga anaa sa gahum.
Samtabng ang protesta nga ilusad sa Oktubre 21 pangulohan sa grupo sa mga mag-uuma gikan sa mga lugar nga naapektuhan sa baha. Kini ipahigayon sa Liwasang Bonifacio aron iprotesta ang matod pa klarong “pagtabon-tabon” sa isyu sa korapsyon sa Kongreso ug sa Independent Commission for Infrastructure (ICI). Moapil usab niini ang nagkalain-laing multisectoral organizations.
Dugang pa sa Kilusang Bayan, nanumpa ang mga grupo, lakip na ang mga organizer sa mass action sa Oktubre 17, nga ipadayon ang ilang koordinado nga paglihok sa umaabot nga mga semana isip pagpangandam sa usa ka nationwide rally sa Nobyembre 30.
Photo courtesy: Kilusang Bayan Kontra Kurakot
