Gikatakdang moatubang sa Independent Commission for Infrastructure (ICI) si kanhi House Speaker ug karon Leyte Rep. Martin Romualdez karung adlawa Oktubre 14, subay sa imbitasyon nga gipadala kaniya sa komisyon sa miaging semana.
Matod ni ICI Spokesperson Atty. Brian Hosaka, gidawat ni Romualdez ang imbitasyon ug gipadayag ang iyang kaandam nga motambong aron mokooperar sa imbestigasyon sa komisyon.
Lakip sa tukion atol sa hearing mao ang proseso sa pamaagi sa nasudnong budget sa dihang siya pa ang Speaker of the House, ingon man ang mga detalye sa budget allocations alang sa flood-control projects nga gipatuman ubos sa iyang pamunoan.
Sa laing bahin, gihangyo usab sa komisyon ang Regional Trial Court nga i-contempt si kanhi Rep. Zaldy Co kung dili na usab siya motunga sa hearing sa komisyon karung adlawa.
Sumala ni Hosaka, tigpamaba sa komisyon, mahimong moresulta kini sa pag-issue og warrant of arrest batok sa kanhi kongresista kung mopagawas og contempt order ang korte.
Base sa report, wa gihapon motubag si Co sa subpoena nga gipadala sa ICI kalabot sa imbestigasyon sa giingong anomaliya nga flood control projects.
Photo courtesy to:Rappler
