Gitinguha karon sa senado ang pagmugna sa ‘Build Back Better Fund’ aron himoon ang pagpaayo sa mga building nga nangaguba tungod sa sunod-sunod nga linog nga miigo sa Visayas ug Mindanao.
Sumala ni Senate Finance Committee Chairman Sherwin Gatchalian, naningkamot na ang senado sa pagpangita og paagi aron magamit ang maong pondo sa pagtabang sa mga residente nga naapektuhan sa linog sama sa Bogo City sa Cebu.
Matod pa ni Gatchalian, ning kasamtangang adunay gigahin nga pondo nga gitawag og ‘Local Support Fund’ nga maoy tuyo nilang gamiton aron makakuha og pondo alang sa pagpa-ayo ug pagpatukod pag-usab sa ilang mga balay.
Mipadayag usab ang senador nga dili kini mahimong bag-ong item sa listahan sa 2026 National Budget, apan magtukod lang og mga bag-ong pamalaod nga mahimong agianan aron magamit ang pondo sa ingon nga mga kahimtang.
Samtang, gipahibalo usab ni Gatchalian nga adunay kapin ₱182 bilyon nga nahabilin sa pondo alang sa mga ahensya/ nga motubag sa mga panginahanglan sa mga apektadong residente.
Sa pagkakaron, nakita nga igo pa ang maong pondo hangtod sa pagtapos sa tuig 2025, ug dili na kinahanglan nga mangayo og supplementary fund.
Photo courtesy to:Manila Bulletin
