Gisaway sa han-ay sa depensa ang desisyon sa International Criminal Court (ICC) nga nagbasura sa interim release request ni kanhi Presidente Rodrigo Duterte.
Gihingusgan ni Atty. ni Nicholas Kaufman nga “usa ka 80-anyos nga adunay sakit” ang natanggong sa kapin sa tunga sa tuig bisan pa adunay garantiya gikan sa estado.
Naglaum kini nga balihon sa ICC Appeals Chamber ang desisyon. Kahibaloang si Duterte anaa sa kustodiya sa ICC sukad kini gi-extradite niadtong Marso. Sugod sa maong bulan, kaduha na gisalikway sa korte ang hangyo sa iyang kampo alang sa interim release.
Usa sa mga rason sa pagpadaplin sa hangyo mao ang mga pamahayag ni VP Sara Duterte mahitungod sa giingong “pagluwas” sa iyang amahan gikan sa prisohan sa The Hague.
Sa usa ka 23-panid nga desisyon nga gipahibalo sa publiko kaniadtong Oktubre 10, ang ICC Pre-Trial Chamber namahayag nga ang mga pahayag ni VP Sara kaniadtong Hulyo ug Agosto nagpakita nga “pagdumili sa proseso sa korte ug buot sa iyang pamilya nga tabangan kini nga malikayan ang prosekusyon.
Gihisgotan usab sa korte nga matud pa gisultihan ni Duterte ang iyang anak nga buot niining mopauli sa Davao City kon buhian kin isa ICC— sukwahi sa pamahayag sa depensa nga magpabilin kini sa nasod nga modawat kaniya.
Kahinumduman nga gihingusgan sa ICC nga kinahanglang magpabilin si Duterte sa kustodiya samtang naghulat sa kumpirmasyon sa mga kaso sa mga krimen batok sa katawhan sa pagpatay nga may kalabutan sa sa war on drugs.
Photo Courtesy to:Manila Bulletin
