Nagkasa og aerial inspection ang Office of Civil Defense (OCD) kauban ang Philippine Air Force sa Davao Region aron makahimo og rapid assessment sa epekto sa magnitude 7.4 nga linog nga niigo sa rehiyon. Gihimo kini aron masuta dayon ang kadaut ug mahatagan og tukmang tabang ang mga apektadong lugar.
Gipangulohan ni OCD Region XI Regional Director Ednar Dayanghirang ang aerial inspection uban ang Tactical Operations Group Region XI gikan sa Eastern Mindanao Command aron dali nga masuta ang gilapdon sa kadaut ug danyos nga nadawat sa rehiyon tungod sa linog. Apil usab sa ilang misyon ang pag-ila sa mga panginahanglanon sa mga residente nga apektado aron mapadali ang pagtabang.
Samtang nagpadayon ang kahimtang, gisaka na karon sa Red Alert Status ang Emergency Operations Center sa Office of Civil Defense National Disaster Risk Reduction and Management Council kon OCD-NDRRMC Region XI aron mas paspas ang pagtubag sa mga panginahanglan ug aron mas dali ang disaster response sa rehiyon.
Padayon ang koordinasyon sa mga ahensya ug lokal nga panggamhanan sa Davao Region aron dali nga mahatod ang dugang nga tabang ug assistance sa mga residente nga naapektuhan sa linog.
Photo courtesy: SunStar
