Nakaalerto karon ang Local Disaster Risk Reduction and Management Office sa kalungsuran ug syudad probinsya sa Bukidnon human lakip nakasinati sa pagtay-og sa magnitude 7.6 nga linog southeast sa Manay, Davao Oriental kagahapon sa buntag ug gisundan pa sa aftershocks kagabii.
Sa maong panghitabo daling mipagula sa executive orders ang mga lokal nga pagagamhanan alang sa suspension sa klase sa tanang level sa pribado ug publikong tunghaan human dunay pipila ang gibati ang kakuyaw ug kahadlok ug masiguro ang kaluwasan ug kaayohan sa mga estudyante, magtutudlo, ug mga kawani sa eskwelahan.
Dinhi syudad sa Malaybalay daling gipagawas usab sa building sa Bethel Baptist Hospital ilang mga pasyenti, samtang dunay mga estudyante sa BSU ug ubang lugar ang nalipong ug nag-anxiety .
Samtang didto sa San Fernando, ug sa Talaingod, Davao del Norte road walay kabalak-an tungod luwas agian ang lugar human masinati ang intensity 4 sa linog.
Matod ni Jolian Tamonan, sa LDDRMO San Fernando, nga wala’y natalang insidente o landslide sulod sa ilang area of responsibility, ilabina sa Talaingod Road nga usa sa mga landslide-prone area kung asa walay natala nga kadaot o casualty sa lungsod.
Gihangyo karon ang publiko nga magpabiling mabinantayon ug magpraktis sa basic safety measures samtang padayon gigusi sa Rapid Damage Assessment and Needs Analysis (RDANA) Bukidnon Team ang epekto sa maong linog dinhi sa probinsya.
via: LGU -Bukidnon
