Gisita ni Batangas 1st District Representative Leandro Leviste ang matud pa sobra nga presyo o “overpriced” nga mga proyekto sa streetlights nga gipatuman sa Department of Public Works and Highways (DPWH) sa iyang distrito gikan tuig 2022 hangtod 2025.
Matod pa ni Leviste, labaw tulo ka pilo sa tinuod nga kantidad ang presyo sa solar streetlight project nga nahimutang sa Nasugbu–Tagaytay Road, nga adunay kantidad nga ₱280,816,956 alang sa 1,202 ka units — o katumbas sa ₱233,624.76 matag usa.
Dugang pa, gitumbok usab niya ang kapin napulo ka pilo (10x) nga pagtaas sa presyo sa Cat’s Eye projects sa Unang Distrito, nga mitumbas og ₱444,388,840 — o kapin ₱26,000 matag unit.
Gipadayag ni Leviste ang iyang kapungot ug kabalaka, tungod kay daghang Cat’s Eye nga bag-o lang gibutang niadtong miaging tuig ang nadiskobrehang depektibo ug wala na mogana, nga nagmugna og peligro sa mga motorista imbes nga mahimong giya sa kadalanan.
Giinsister ni Leviste nga ang kinatibuk-ang kantidad sa mga maong proyekto nga milapas og ₱884 milyon dili angay aprobahan sa Kongreso kon dili ibanan og 25% ang gasto niini, lakip na ang uban pang mga proyekto sa DPWH nga may kaparehong isyu.
Photo courtesy: POLITIKO
