Gipili na sa International Criminal Court (ICC) ang tulo ka medical experts nga motan-aw sa kahimtang sa panglawas ni kanhi Pangulong Rodrigo Duterte.
Ang mga eksperto naggikan sa behavioral neurology, neuropsychology, ug forensic psychiatry, ug giila nga adunay taas nga kasinatian sa ilang tagsa-tagsa ka natad.
Sumala sa siyam ka pahinang dokumento nga gipagawas sa Office of the Prosecutor, nga pirmado ni Deputy Prosecutor Mame Mandiaye Niang, gisuporahan nila ang pagtukod og multidisciplinary panel of experts aron susihon kung ang kanhi presidente angay bang atubangon ang proseso sa pagdinig.
Gipahibalo usab nga ang mga eksperto andam na sa ilang serbisyo karong buwana.
Sa maong dokumento, gikontra usab sa Prosecution ang baruganan sa Depensa nga ang pagtudlo sa mga eksperto posibleng mamahimong bias o pabor sa usa ka panig.
Una nang wala tugoti ang medical officer sa ICC nga personal nga mosusi sa panglawas ni Duterte.
Kahinumduman nga kaniadtong Marso, gi-aresto ang kanhi pangulo may kalabotan sa iyang kampanya kontra iligal nga droga sa panahon sa iyang administrasyon.
Photo courtesy: VOA
