Nagpahayag si US President Donald Trump sa iyang kumpiyansa nga mapagawas na sa Lunes o Martes sa umaabot nga semana ang mga bihag nga gihuptan sa grupong Hamas, ubos sa ginahimong kasabutan sa kalinaw tali sa Israel ug Hamas.
Atol sa iyang cabinet meeting, gipasigarbo ni Trump ang iyang inisyatibo sa pagpasiugda og peace deal nga nagtinguha sa pagwagtang sa dugay nang panagbangi sa Gaza.
Kabahin sa kasabutan ang pagpahigayon sa unang hugna sa pagpagawas sa mga bihag sa duha ka panig, nga giila ni Trump nga maoy sinugdanan sa usa ka pangmatagalang kalinaw sa rehiyon.
Sumala sa report, gilauman nga sa sulod sa 72 oras human sa pagsugod sa ceasefire, mopagawas ang Hamas sa 20 ka buhing bihag nga ilang gihuptan sukad sa ilang panagbangi batok sa Israel.
Gisulti usab ni Trump nga plano niyang mubiyahe ngadto sa Egypt aron motambong sa pirmahan sa kasabutan tali sa Hamas ug Israel.
Mahinumduman nga nagkasabot na ang Israel ug Hamas human sa duha ka tuig nga panagsangka, nga nagresulta sa daghang kaswalti ug kadaut sa Gaza Strip.
Photo courtesy: iNews
