Magpadayon ang karera sa Filipina tennis star Alexandra “Alex” Eala sa tulo ka sunod-sunod nga WTA 250 tournaments sa Asia nga magsugod sa sunod semana, isip kabahin sa iyang pagpangandam sa pagtapos sa WTA season.
Human sa iyang partisipasyon sa US Open, nakapakita si Eala og impresebo nga performance sa tulo ka WTA 125 events, lakip na ang pagkadaog sa Guadalajara 125, semifinals finish sa Jingshan Tennis Open, ug quarterfinals sa Suzhou Open.
Nakaduwa usab siya sa WTA 250 São Paulo Open sa Brazil, diin nakaabot siya sa quarterfinals. Bisan pa man sa kapakyasan sa qualifiers sa Wuhan Open (WTA 1000), nagpabilin gihapon ang 20-anyos nga si Eala, nga karon ranked No. 54 sa kalibutan, nga determinado nga makabawi sa nagkadool nga katapusan sa season.
Unang mosalmot si Eala sa Japan Women’s Open, diin posibleng iyang maatubang ang mga dagkong ngalan sa tennis sama nila Naomi Osaka, Leylah Fernandez, ug Cristina Bucsa nga mao ang nakapilde kaniya sa US Open.
Sunod niini, modula siya sa Guangzhou Open (Oktubre 20–26), ug pagkahuman niini, mosalmot sa Hong Kong Tennis Open (Oktubre 27–Nobyembre 2), diin posible niyang makaatubang pag-usab ang pipila sa iyang mga kanhing kaatbang sama nila Emma Raducanu, Clara Tauson, ug uban pang top-ranked players.
Photo courtesy: GMA Network
