Gipahibalo ni Department of Public Works and Highways (DPWH) Secretary Vince Dizon nga nakadiskubre sila og 421 ka mga ghost flood control projects sa nagkalain-laing bahin sa Pilipinas.
Sa gihimong press conference sa opisyal kauban si Independent Commission for Infrastructure Executive Director Brian Keith Hosaka, gipadayag sa kalihim nga kaabag nila sa gihimong validation sa mga gipangsumbog nga anomalusong proyekto ang Armed Forces of the Philippines (AFP), Philippine National Police (PNP) ug ang Department of Economy, Planning, and Development kon DepDev.
Dinhi natumbok nga sa 8,000 ka mga proyektong gi-inspeksyon sa bisan asang dapit sa nasud, 421 niini ang natumbok nga mga ghost flood control projects ug ang maong impormasyon, ila nang gisumite ngadto sa Independent Commission for Infrastructure (ICI) aron maapil sa ilang imbestigasyon.
Gipadayag pa sa kalihim nga inisyal pa lamang kini og siguradong madugangan pa sa pagpadayon sa inspeksyon.
Samtang gipadayag usab ni ICI Executive Director Brian Keith Hosaka nga ilang girekomenda ngadto sa Department of Public Works and Highways (DPWH) nga ubsan ang ilang threshold sa Levels of Authorities kon LOA pag-abot sa procurement sa mga civil works project.
Gikan matod pa sa kanhi 400-milyones pesos nga limitasyon sa Regional Engineering Office, himuon na lang kining 200-milyones pesos samtang sa district level, konhuran usab kini ngadto sa 75-milyones pesos gikan sa 150-milyones pesos.
Tumong niini nga mapahapsay ang kontrol, transparensiya ug accountability sa proseso sa pagpatuman sa ilang mga proyekto.
Photo Courtesy to: Manila Standard
