Walay kalamidad nga nakabalda sa grand finals sa Miss Asia Pacific International 2025 karong tuiga, ug sa katapusan, nasungkit ang korona ni Isabela Fernandes gikan sa Brazil.
Mibidlisiw ang kaanyag ni Isabela Fernandes nga nahimong star sa Gala Night, luyo nga gitay-og sa linog nga may kusog nga 6.9 nga magnitude ang Cebu, apan nalampos gihapon ang grand coronation show nga gipahigayon sa Cebu Coliseum.
Si Fernandes nakakuha sa korona human niyang napildi ang 42 pa ka kandidata nga nagtinguha sa titulo. Siya ang mohulip sa 2024 nga reyna nga si Dominican-American Janelis Leyba.
Apan si Leyba wala makahatag nga personal sa korona kay mibalik kini sa Estados Unidos usa ka adlaw human sa linog tungod sa trauma nga iyang nasinati.
Si Sharifa Akeel-Mangudadatu, ang 2018 Miss Asia Pacific International winner, maoy mitaod sa korona kang Fernandes. Usa si Akeel sa mga hurado karong tuiga.
Kauban sa bag-ong reina ang upat pa ka kandidata nga nakasulod sa final round:1st runner-up: Anita Rose Gomez (Philippines); 2nd runner-up: Bowonrat Maneerat (Thailand); 3rd runner-up: Jana Janssens (Belgium); 4th runner-up: Delilah Elmira Wildeboer (Netherlands); Si Gomez, nga taga Zambales, napakyas sa pag-angkon sa ika-unom nga korona para sa Pilipinas bisan pa man sa iyang kusog nga performance — nakadaog siya og Best in Swimsuit ug 1st runner-up sa Evening Gown competition.
Sa question-and-answer portion, nakuha niya ang simpatiya sa audience human siya mitumong sa trahedya nga linog nga nasinati sa tanang kandidata. Ang mga kandidata nga nakaabante sa semifinals misalmot sa swimsuit ug evening gown segments, samtang ang Top 10 mibato sa hagit sa question-and-answer round aron makasulod sa Final Five.
Karong tuiga, gi-realign sa Miss Asia Pacific International ang ilang mga kalihokan isip pakig-uban sa mga biktima sa linog. Ang mga kandidata mitabang sa relief operations nagputos og mga ayuda ug personal nga nag apod-apod sa mga hinabang sa mga apektadong residente sa mga lungsod sa Daanbantayan, Medellin, ug San Remigio sa amihanang bahin sa Sugbo.
Source Photo: Pageanthology
