Nanawagan si Presidente Ferdinand Marcos Jr. sa mga opisyal sa lokal nga kagamhanan nga magtinabangay aron tapuson ang korapsyon ug mabalik ang pagsalig sa publiko sa gobyerno.
Atol sa pagpanumpa sa mga bag-ong opisyal sa League of Cities of the Philippines (LCP) ug League of Municipalities of the Philippines (LMP) sa Malacañang, gihimug-atan sa presidente nga dili niya itugot ang bisan unsang matang sa korapsyon.
Matod ni Presidente Marcos, katungdanan sa tanang opisyal ang paghunong sa sayop nga buhat nga makaguba sa pagsalig sa katawhan ug sa kaugmaon sa nasud.
Isip kanhi gobernador, ang presidente miingon nga nasayod siya sa mga hagit sa lokal nga liderato ug gidasig ang mga opisyal nga magpabiling matinud-anon ug mahimong ehemplo sa serbisyo publiko.
Ang presidente bag-o lang mimando og imbestigasyon sa giingong kickback scheme sa flood control projects ug mipirma usab og executive order nga nagmugna sa Independent Commission for Infrastructure (ICI) aron tan-awon ang mga iregularidad ug pasakaan og kaso ang mga nalambigit.
Photo Courtesy to:PIA
