Gipasabot sa Office of Civil Defense (OCD) Region 9 ang katuyuan sa pagpasaka sa nagkadaiyang mga alert level status sa Zamboanga Peninsula Region kun adunay mga naapektohan sa daot nga panahon.
Matod ni OCD 9 Regional Director Atty. Ruel S. Halanes, ang gipa-aktibong Emergency Operation Center mao ang kanunay magmonitor sa mga weather disturbance ug sila usab ang moila sa alert level nga gikinahanglan nga iisa sa rehiyon.
Apan pagpaklaro ni Atty. Halanes nga kun ang panghitabo sama sa kusog nga linog nga muigo sa usa ka lugar sama sa nahitabo sa Cebu, automatiko nga iisa ngadto sa “Red Category” ang alert level status sa rehiyon.
Kun Red Category na ang “Alert Level” kini nagpasabot nga naka deploy na ang tanang mga personahe sa disaster response sa nagkadaiyang mga Local Government Units (LGUs).
Pinaagi matod pa sa pag-isa sa mga alert level status sa usa ka lugar matudloan og magiyahan ang mga member agencies o state actor sa gikinahanglan nga pagahimoon panahon sa emerhensya.
