Gihatagan ug katin-awan kapulisan sa lungsod sa Libona ang isyu sa giingong adunay natakdan ug wakwak didto sa barangay Crossing sakop sa maong lungsod nga mikatap social media ning bag-o lang.
Sumala pa ni Police Captain Erwin Tabequero Chief of Police sa Libona PNP, Police Captain Erwin Tabequero Chief of Police sa Libona PNP atol sa pakighinabi sa Juander Radyo Malaybalay nga base sa ilang gihimong imbestigasyon nasuta nga ang sakit sa pasyente nga si Louela Mata Acute Gastroenteritis usa ka klase sa diarrhea ug dili tinuod nga natakdan kini sa wakwak.
Gipanawagan ni Tabequero ang publiko nga kung mahimo dili dayon mutuo sa mga makita online kung dili sigurado kung tinuod ba kini o content lang aron dili makadungang sa kabalaka ug kalibog sa katawhan taliwala nga gihingusgan sa igsuon sa pasyente nga tinuod ang nahitabo.
Una nang giklaro sa lokal nga pangagamhanan sa Libona ang maong isyu diin base sa gipagula nga official statement sa lungsod nga hangtod niining taknaa, walay nadawat nga opisyal nga report gikan sa Municipal Health Office o sa buhatan sa Mayor ug nagbuhat na kini ug igong lakang aron masuta ang tinubdan sa maong balita.
Ang lungsod sa Libona luwas ug malinawon diin ang lokal nga pangagamhanan padayon nga nagabantay ug naga-monitor aron masiguro ang kahimsog ug kaluwasan sa tanan.
via: Libona PNP
