Giklaro ni Senate President Pro Tempore Ping Lacson nga ang pagkansela sa P1.6 trilyon nga proyekto sa Department of Public Works and Highways (DPWH) makatabang dili lang sa pagpondo sa mga programa sa panglawas ug edukasyon, kon dili lakip na sa pagkunhod sa utang sa nasud.
Matod ni Lacson nga gisuportahan niini ang sugyot ni Rep. Leandro Leviste nga ipatuman kini nga lakang. Gipahayag ni Leviste, ang mga kontrata sa DPWH nagtugot sa pagkanselar sa proyekto ubos sa “termination for convenience” kung dili na praktikal ang proyekto, o “termination for unlawful acts” kung mapamatud-an ang korapsyon.
Giawhag niya si DPWH Secretary Vince Dizon nga kanselahon ang P1 trilyon nga proyekto alang sa 2025 ug ang P600 bilyon nga proyekto alang sa 2026, nga gibanabana nga moresulta sa P400 bilyon nga savings.
Una nang gibutyag ni Lacson sa duha ka privilege speeches ang korapsyon luyo sa palpak ug peke nga flood control projects, uban sa sistematiko ug dayag nga korapsyon sulod sa DPWH.
Matod ni Lacson, iyang tutokan ang gisugyot nga 2026 budget sa DPWH ug nanawagan sa mga magbabalaod nga magpakitag pagpugong sa kaugalingon sa pagsugyot og realignment, ilabi na sa mga proyektong imprastraktura nga gipundohan sa lokal.
Photo Courtesy to:Manila Standard
