Gipang apod-apod sa Department of Social Welfare and Development (DSWD) Field Office Caraga ang ₱517,809,000.00 alang sa ikatulong kwarter sa tuig 2025, nga nakabenepisyo sa 172,603 ka kabus nga senior citizens sa tibuok rehiyon ubos sa Social Pension for Indigent Senior Citizens (SocPen) Program.
Base sa taho sa Regional Social Pension Unit (RSPU), ang Agusan del Norte nakarehistro og 41,413 ka benepisyaryo nga nakadawat og ₱124,239,000.00, samtang ang Agusan del Sur adunay 44,525 ka senior citizens nga nakadawat og ₱133,575,000.00. Sa Province of Dinagat Islands, 11,040 ka benepisyaryo ang natabangan nga adunay ₱33,120,000.00, ug ang Surigao del Norte nakatala og 34,194 ka benepisyaryo nga adunay total nga ₱102,582,000.00. Samtang, sa Surigao del Sur, 41,431 ka senior citizens ang nakadawat og ₱124,293,000.00.
Sa datos hangtod Setyembre 30, 2025, 93.45% ang target nga mga benepisyaryo sa SocPen Program ang nakadawat na sa ilang kwartahanong ayuda.
Ang Social Pension for Indigent Senior Citizens Program nagahatag og ₱1,000 matag bulan sa kwalipikadong senior citizens nga edad 60 pataas, aron matabangan sila sa ilang pang-adlaw-adlaw nga gasto ug panginahanglan medikal. Tumong niini nga mapaayo ang kaayohan ug dungog sa mga katigulangan sa ilang pagkatigulang.
Sa tibuok rehiyon, ang DSWD Field Office Caraga nagserbisyo sa kapin 184,000 ka senior citizens pinaagi sa SocPen Program.
Gipahinumduman usab sa DSWD Caraga ang mga benepisyaryo nga makig-koordinar sa ilang mga Local Social Welfare and Development Offices (LSWDOs) ug sa Office for Senior Citizens Affairs (OSCA) alang sa hustong iskedyul sa ilang payout
Photo courtesy to DSWD Caraga
