Niabot sa 4th alarm ug gatosan ka mga pamilya ang naapektuhan human nga gilamoy sa dakong sunog ang gatosan usab ka panimalay sa Brgy 17 ning siyudad sa Cagayan de Oro sa nakalabay nga semana. Matod pa sa Cagayan de Oro fire District nga kini ang pinakadako nga sunog nga natala sa dakbayan gikan niadtong buwan sa enero ning tuiga.
Sa datos sa BFP anaa ra sa kapin usa ka milyon nga pesos ang damyos, layo ra sa pag estemar usab ni Kapitan Atterviry nga anaa sa 30 million pesos. Samtang nakahatag og kahasol sa mga bombero sa pag palong sa kalayo ang kapi-ot sa mga dalan.
Gipahimangnoan ni Fire Inspector Maria Ranelie Salga ang tanang katawhan nga magbinatayon aron malikay sa sunog labi pa nagkadaghan ang natalang residential fire sa syudad.
Maykalambigitan niini nga balita, ubay-ubay ka pribadong indibidwal, grupo ug organisasyon ang mitunol sa ilang mga donasyon kang Kapitan Anthony Atterviry alang sa mga nasunugan sa Brgy. 17 ning Dakbayan sa Cagayan de Oro.
Gilangkoban ang mga donasyon sa Cash ug mga goods sama sa bugas pang sustener sa panginahanglan sa mga naapektuhan sa sunog. Midagsa usab ang mga nag pahigayon og feeding program sa mga bakwit nga nawad-an ug panimalay.
Subay kini sa panawagan ni kapitan sa mga taong makatabang sa iyang mga ginsakupang lumupyo, tungod kay wala pa kabalo si Kapitan kung hangtod kanus-a magpasilong sa evacuation center ang mga nasunugan.
