Gipangunahan ni Baguio City Mayor Benjamin Magalong ang pagpatuman sa blockchain technology sa iyang siyudad aron mapalig-on ang transparency ug accountability.
Ang Blockchain usa ka matang sa teknolohiya alang sa pagtipig ug pagpaambit sa impormasyon nga luwas, transparent, ug dili mausab.
Kini usab makapalig-on sa relasyon ug kooperasyon tali sa Ehekutibo, Lehislatura, mga organisasyon sa katilingban ug uban pang mga sektor nga adunay importante nga papel sa pagpalawom sa demokrasya.
Gibutyag ni Magalong, nga nakig-alayon na sila sa usa ka tech company aron mapatuman kini. Matod niya nga nag-andam usab sila sa gikinahanglang mga dokumento ug mga rekord nga ibutang sa blockchain.
Base sa pahayag ni Department of Information and Communications Technology Secretary Henry Aguda nga ang pagpatuman sa blockchain technology mahimong masugdan bisan og wala pay balaod nga napasar.
Dugang pa niini nga ang usa ka balaod gikinahanglan aron kini mahimong permanente, sa kaso sa usa ka pagbag-o sa administrasyon, ang data padayon nga marekord sa blockchain.
Gihatagan ug gibug-aton ni Senador Bam Aquino nga panahon na nga himuong mas transparent, accessible, ug mas sayon nga masabtan sa katawhan ang proseso sa nasudnong budget.
Gipasabot sa senador nga pinaagi sa blockchain, makita sa publiko ang tanang importanteng detalye sa budget sama sa bidding, awarding, disbursement of funds, ingon man ang mga kontrata ug bills of materials.
Photo Courtesy to:Coingeek
