Gisugyot sa pipila ka mga kongresista ang pagpasa sa balaod nga mopahamtang og mas taas nga buhis sa sweetened beverages ug 3-in-1 coffee aron mapugngan ang sobra nga konsumo sa tam-is nga ilimnon ug aron makadugang og kita sa gobyerno.
Ang House Bill 5005 nga gisang-at nila Rep. Krisel Lagman (Albay), Rep. Kaka Bag-ao (Dinagat Islands) ug Rep. Leila de Lima (ML Party-list) naglatid sa 20% hangtod 40% nga buhis, mas taas kaysa kasamtangan nga 6% hangtod 12% nga rate.
Sa balaodnong sugyot, ipahamtang ang P20 buhis matag litro sa mga sweetened beverages nga gigamit ang caloric ug non-caloric sweeteners, ug P40 matag litro kung kini adunay high fructose corn syrup. Lakip usab ang P6 buhis matag litro sa gatas, fermented milk, flavored non-dairy milk, ug tanang klase sa sweetened coffee products lakip ang 3-in-1 coffee.
Apan, exempted niini ang mga ilimnon nga naggamit lamang og coconut sap sugar ug steviol glycosides. Matod ni Lagman, bisan nakatabang ang Tax Reform for Acceleration and Inclusion (TRAIN) Law sa unang mga tuig, dili na igo ang 6%–12% nga buhis aron makunhuran ang konsumo ug makadugang sa kita sa gobyerno.
Gibanabana nga makahatag ang maong balaodnon og P55 bilyon matag tuig, mas taas kay sa kasamtangan nga P35 bilyon–P38 bilyon nga ginakolekta. Ang pondo gamiton para sa: 40% para sa PhilHealth; 10% para sa Department of Health alang sa medical assistance ug health facilities enhancement; 50% para sa nutrition programs sa lokal nga panggamhanan.
Photo courtesy to: soifdesante.ca
